Ngening Singkwenta Naka, Ma

O Ma, api-isip-isip ku mu nyang milabas a bengi,
Tutu palang asne kabilis lilipas ing panaun ne?
Balamu kapilan daka pa tukyan-tukyan keng eskuwela,
Kayi eku pa mipatudtud nung e makasiping keka.

Ngeni, miras naka edad singkwenta
Eka migaganaka, anak naka man itsura;
Nung midikit kata, anti tamu mung mikapatad,
Kaybat mas malagu ka pa kanu kakung palak?

Kareng banwang nilabas keka, masaya ku,
Uning ikit ku na ala kang sinayang keng biye mu;
Mekapag-paragul kang adwang malagung dalaga,
Dagdag me pa ing masanting mi kanung tata.

Nung e kareng marakal mung masakit a kandut,
Siguru imbes makasaup, meging ku pang salut.
Pero pepa-intindi me kaku ing ulaga na ning biye,
Anya naman ing lakad ku, tutulid keng pane.

Eku makaisip pamikatagun na megkulang ka kekami,
Maliban na siguru neng ala ka keng parents' meeting. (hehe!)
Keng makabang panaun meging kang Ima ampong Tatang,
Keng sikanan at lugud mu, karin ku kukwang tapang.

Para kaku, Ma, ika ing pekamagaling a mestra,
Ay, nung balu mu mu, idol dakang talaga!
Marakal estudyanteng megtiwala at linugud keka,
Nung mag-autograph ka, mumuna naku keng pila!

Ikit ku ing malalam mung lugud kareng aliwang tau,
Anggang kareng ali mu naman talaga kananu-nanu.
Pauli na ning alimbawa at turu mu, dakal biye mibayu,
Anya pakamalan kung tutu ing kekang anggang payu.

O Ma, buri kung abalu mu na pagmaragul dakang tutu!
Keng buong biye ku, ikang megsilbi ku mong sulu.
Kapitna na ning biye mu, para kaku me ginamit,
Ngening singkwenta naka, aku naman ing makipalit.

Anya sabyan mu kaku ing buri mu, enaka marine,
Anggang manos pang pinggan, ali mu sa pane-pane.
Balu mu namang ibiye ku ngan ing egana-gana,
Uning ala namang katumbas ing lugud ku keka.

Masayang kebaitan keka!!! Kaluguran daka...