ACHS-SSC

Pilan namung duminggu kanini, muli naku pilipinas. Anggang pilan ku mung aldo magliw-aliw karin, maswelu ku pamu rin. Kasi naman, pabanwa ku neng ali akakit ing Indu kung balayan. Lalu na agaganaka ku neng hustu e Apu ku. Kaya ala ng makapigil kaku kanini, panga-Oktubre a-sinco, susulapo naku pabalik keng Pilipinas.

Kabang palapit nang palapit ing pamanuli ku, parakal nang parakal deng alaalang pabalik-balik keng isip ku. Metung na kareni ing kanakung high school. Mekayari ku pung High School keta Angeles City High School - Special Science Class, mas sikat kanita keng lagyung "SSC." Metung ya kareng sikat a eskwela keti Pampanga ini. Eka kanu milub keng eskwelang iti nung eka matni buntuk. Lugud ning keng Babo, milub ku keng eskwelang iti at kanita ku apatunayan na atin ping kasakitan ing magaral karin - ali mu keng kabiasnan at katalarwan, dapot keng egana-ganang aspetu na ning pamagaral.

Balamu mag-apply kang obra bayu ka milub keng eskwelang ini. Mumuna, dapat mag-apply ka kayabe ita recommendation na ning elementary school a panibatan mu. Kayi, dumalan ka keta written examination a amanwan da. Ketang panaun ku, dinalan la reng kutang a dapat sagutan. Kaybat ing mapilan dumingu, abalu mu ing resulta. Istung mipasar ka keng exam, dumalan naka na namang panibayung exam - itang oral exam o interview a awsan da. Keni, misalang ka kareng aliwa-liwang kutang tungkul keng pangatau at ugali mu keng pamagaral. Kadalasan ken lang Ingles reng kutang anya dapat ka mu ring makibat keng Ingles. Istung mipasar ka keng interview, uyta, malyari nakang mag-enroll.

Alimpasan ku ngan ita. Pero, ala kung balak magaral SSC anyang mumuna. Pegbigyan ke mu e mama ku kaya mebisa kung dumalan karetang tests pero buri ku sana tuki ku keng eskwela da reng kaluguran ku. Anyang dintang na ing graduation ku keng elementarya, kabud ne mu dintang ing OIC ning SSC, Dr. Ocampo, magdala-dala yang SSC gold medal saka ya mikyat keng entabladu. Agpang kaya, menibatan ya keng elementary school ku ing Top Notcher ketang SSC High School entrance exams. Mebigla naku mu anyang ing lagyu ku ing mewaus. Aku pala ita! Kanita ku aisiplungub keng SSC ba kung asubukan. Lalu na, makarine naman nung eku malawus karin kaybat dakung peparangalan.

Mumunang aldo... maybug kung mangapauli keng disnan kung eskwela. Lege dakami karetang sobrang lumang kwartu, alang awang, alang kisame, busbusan a yero, marinat, mabuluk. Makapagaga talaga. Pero kanita ku aisip, masaya yata keni kasi "kakaiba." Balakusa mo apin na ita ing pekamasakit a pwedi ming pagdalanan pero ali pa pala... Anyang binye na no ning mestra mi reng seating arrangement, kulang kaming metung a bangku. Kitang na ning mestra nung ninung bisang makipitnang bangku pansamantala. Alang magtas gamat. Agad-agad nakung megtas gamat uning eku buring lumungkut ya tang kakalase kung metung. Lalu na kakilala ke nyang elementarya kami. Tutu na nini, kalaban ke kareng marakal a patimpalak pero yari na ita. Makasadya kung maging kaluguran na.

Uyta rugu, adwang bulan a maatsat, kapitna namu ning buldit ku ing makalukluk ampong liwas-liwas kaming susulat keng desk mi. Masakit ta pero masaya kaming parehu. Meging kaming sanggang dikit - mikaluguran angga na ngeni. Angga king miras din ing aldo na pelipatan dakami karetang bayung kwartu. Hay, dakal a salamat pu! Mipasno kami rin. Meging kung presidenti ning klase mi at gewa ku ing agyu ku para maging masalese ya ing section mi. Miras ku keng I-Archimedes. Deng anggang section makalagyu la kareng sikat a scientists.

Penyubukan ku ring makyabe kareng liwa-liwang grupo anti mong clubs. Mekwa kung tala-dalit keng choir ning eskwela. Masanting ku kanu bosis anya sinabak daku keng pamagkanta king Lupang Hinirang. Ay rugo, keng sobrang nerbyus, akalingwan ku la reng liriko pati na ing tono. Mipakarine kung husto oneng pibala-balugbug ku namu. Inisip ku na makabawi ku rin potang minsan. Mekabawi naku man bayu ya meyari ing banwa anya mipasno naku rin. Makanyan pa man, maragul yang kamarinayan ita. Sabage, marakal naku man agawang kamarinayan anyang high school, e. Hehehe!

Pero nyang minsan a aldo, ikwa ku talagang asabi na pagmaragul kung magaral ku SSC. Nyang minsan sinake kung jeep pauli (Check point ing ruta, detang kule asul), kitnan naku ning driver nung magaral ku SSC. Sabi ku, "Opu." Kayi pengutnan na nakung marakal a marakal a bage tungkul keng Science, Histroy at marakal pa. Asagut ku no man ngan deng kutang na. Kayi ana kaku, "Byasa kayu pin, ikayung estudyante SSC. Samasan yu, inang. Ana ping Dr. Rizal, ikayu ing pag-asa ning balen." Asna ku kaswelu nyang katipa ku keng jeep kasi maniwala la pala reng tau kekami, atin pang mamasa na ikaming kayanakan (lalu na reng magaral SSC) ing ikapasno ning balen. Binitbit ko reng amanung areta keng buong panaun atsu ku SSC, eke buring mabigu e Bapa (tang driver) at higit kaninu pa man, eke buring mabigu ing Indung Balayan. Angga ngeni, mabye la keng isip ku reng amanung ng maganakang bapa... Anggang makalaut ku ngeni, isip-isipan ku nung makananu ku ping maka-serbisyu keng Indu kung balen. Siguru, paritak-ditak... Angga keng asabi kung gewa ku ing parti ku.

Anyang mumuna, sasabyan ku keng maestro ku na angga ku mung pabanwa SSC kayi lumipat nakung eskwela. Oneng megbayu ita - anyang tikman ku ne ing mumunang banwa at meka-kaluguran nakung marakal, enaku bisang mako. Ni e na linub keng isip ku ing batingan ke ing eskwela. Wa, marakal kasakitan pero keng gulut da reta, mas marakal ing masaya. E ku ne alako keng biye ku ing SSC - deng deliberation flowers, tambayan a kubo, math park, science garden, science lab, computer lab, hallway, classrooms - deni ngan, malino lang malino keng isip ku pati reng alaalang makadikit karela. At balikan ku la ngan deni kasabe da reng masaya, masukal, maslam, mayumu, mapait at manyaman a alayala ning haiskul.